Hello👋🏻我係Mer-Veille嘅Co-Founder Lavinia。我曾經反覆爛面8年，所以去到今日仍然有容貌焦慮；我無好Fit嘅身型，仲有個肚腩仔；我又經常懷疑自己，覺得自己無嘢叻，比較邊方面不如人。

當我無自信、內向怕羞嗰陣，我會擔心畀人話；當我想放負又會唔想聽到人講正面啲啦、好小事啫、唔好咁諗；當我黑面認真工作嗰陣又畀人問我做咩唔笑🤷🏻(同我一樣天生黑面嘅人一定明🌚)！

太多Social Media嘅資訊、太多比較、太多意見，令我哋好多時候過份著重人哋點睇自己，有時諗諗吓會沉落去，會無自信，會好迷惘，亦會忽略咗照顧自己嘅感受。

我哋每日要處理唔同嘅任務，面對各種各樣嘅人，接收緊海量資訊，總有唔同嘅感受，有上上落落嘅狀態。無論正面或負面，開心唔開心，都係你嘅感受，係真實喺你心裡面出現嘅感覺，係最值得你重視嘅感受。

或者今日起身照鏡有容貌焦慮，聽日發夢羨慕人哋樣靚身材正，後日擔心自己返工表現麻麻地，再後日反省自己無人哋嘅成就。

但我想講嘅係，It’s okay，It’s totally okay。每日嘅經歷、諗法同感受都令人成長同改變，塑造出獨一無二嘅你。我哋唔需要做個完美嘅人，唔使追求零毛孔白滑肌膚，唔使成日諗點滿足其他人，唔一定樣樣嘢做足100分。我哋要做嘅係好好愛自己同照顧自己嘅感受，行自己獨特嘅路。你有幾好有幾正，有幾Special，有幾Wonderful，最緊要你自己知😉～(當然都可以大大聲話畀全世界知！)

學識接受自己嘅缺陷，試吓多啲了解自己，專注喺自己身上，你會調返轉頭更識得欣賞自己。

You are just wonderful as you are.💕